Shfaqje Speciale: Shkrepëtima | Petrit Halilaj

Jemi jashtëzakonisht të gëzuar t’ju njoftojmë se filmi Shkrepëtima i Petrit Halilajt do të ketë një shfaqje speciale në DokuFest. Filmi ndjek projektin artistik me po të njëjtin emër i cili ndezi një dritë në komunitetin e fshatit të artistit Halilaj, në Runik. Filmi do të ketë premierën kombëtare në Lumbardh, me datën 08 Gusht dhe do të përcillet me një diskutim mes Petrit Halilaj dhe kuratorit Leonardo Bigazzi.

Ideuar dhe drejtuar nga njëri ndër artistët më të shquar të Kosovës, Shkrepëtima e Petrit Halilajt u emërua sipas revistës multi-etnike të publikuar nga mësuesit, aktorët si dhe studentët e Runikut në fund të viteve 70 si dhe në fillim të viteve 80.

Shfaqja u mbajt përpara rrënojave të Shtëpisë së Kulturës në Runik (Skënderaj) dhe ishte vazhdim i një hulumtimi të gjerë 6 mujor mbi të kaluarën e Runikut, marrë nga kujtimet personale, socio-historike, dokumente, publikime, burime të gazetave, arkivave të komunës si dhe nga intervista me njerëzit të cilët kanë qenë të përfshirë në jetën kulturore dhe në teatër. Performanca tri pjesëshe përfshiu aktorë profesionistë, muzicientë, komunitetin lokal si dhe anëtarë të familjes së artistit. Rrënojat e skenës së teatrit u rigjallëruan nga skulptura lëvizëse, tinguj e zëra, drita si dhe një skenografi e jashtëzakonshme e krijuar enkas nga Halilaj me materiale të gjetura në rrënojat e ndërtesës së teatrit por edhe e inspiruar nga kujtesa kolektive e banorëve të Runikut. Nata risolli edhe kaëtr fragmente nga drama të  shquara shqiptare të cilat dikur qenë performuar në teatrin e Runikut gjatë viteve të 80a.

Shkrepëtima zhgroposi të kalurën neolitike të Runikut, revitalizoi shtëpinë e kulturës së Runikut, frymëzoi komunitetin e saj por mbi të gjitha hapi rrugën drejt iniciativave institucionale të Ministrisë së Kulturës të cilat rezultuan me përfshirjen e Shtëpisë së Kulturës në Listën e Trashëgimisë Kulturore për Mbrojtje të Përkohshme.

Projekti u përcoll me një ekspozitë në Zentrum Paul Klee (CH) dhe në Fondazione Merz (IT) ndërsa katalogu që dokumenton hulumtimin, fotografitë si dhe materialet e tjera nga i gjithë projekti do të publikohet nga hopefulmonster.

DonChristian x Perera Elsewhere | DokuNights

Me datën 8 Gusht, po i paraprijmë konferencës fantastike të DokuTech me një parti të kuruar nga skuadra e saj, që sjell në DokuNights reperin e famshëm të Nju Jork-ut DonChristian si dhe muzikanten e muzikës elektronike eksperimentale PereraElsewhere!

DONCHRISTIAN JONES është artist vizual, reper, këngëtar/tekst-shkrues, dhe producent nga Nju Jorku. Veprat e tij përfshijnë performanca muzikore të kohës, përzierje të muzikës rep, video dhe murale publike, përzierje të tjera të zhanreve të hip-hopit me vizatime si dhe referenca të muzikës klasike dhe stileve të tjera bashkëkohore. Shumica e veprave të tij inspirohen nga koha që ai kalon duke vizatuar murale në Ishullin Rikers me miqtë e tij të rinj. Don ka shfaqur dhe performuar në Whitney Museum, MoMA Ps1, Webster Hall, Dancespace, Center for Performance Research si dhe ka qenë pjesë e rezidencës Robert Rauschenberg Foundation, Captiva, Florida. “Where There’s Smoke” është studio-albumi i tij i parë, i publikuar në qershor të vitit 2018.

E njohur me pseudonimin PERERA ELSEWHERE, Sasha Perera është producente e muzikës elektronike eksperimentale me prejardhje nga Mbretëria e Bashkuar. E farkëtuar nga thellësitë e Londrës, duke e konsideruar Berlinin si strehë të shenjtë, Perera mbledh shpirtërat e humbur dhe presupozon të nesërmën përmes zanatit të saj. Duke vepruar me instinkt më shumë se me matematikë, duke përfshirë elemente organike që komplementojnë dhe bashkë-ekzistojnë me robotikën, ajo ruan me kujdes hapësirën ku ndodhin kalimet e saj zanore të qeta dhe joshëse… këto janë pak a shumë materiali bazë i ëndrrave tashmë të zgjuara të Pereras. Nga zhavorri i klubeve të errëta tek absorbimi i tingujve indigjenë dhe stileve të saj udhëtuese, Perera i bashkon këto frymëzime në lumturinë e saj gjysmë-akustike, abstrakte dhe shumë-ngjyrëshe.

Prodhimet e DokuLab

Teksa po përgatitemi të festojmë 18 vjetorin e festivalit tonë, 18 filma pjesë e programeve të ndryshme edukuese të departamentit DokuLab do të shfaqen për dy ditë me radhë në kinematë tona, pranë lumit. Mbrëmja e 6 Gushtit do të shënojë fillimin e shfaqjes së gjashtë dokumentarëve të prodhuar nga gjenerata e shtatë e nxënësve të shkollave të mesme, të regjistruar në Shkollën e Dokumentarit “Future is Here” të DokuFest.

Këto tregime të fuqishme trajtojnë çështje të ndryshme. Në njërën anë, kemi një viktimë të ngacmimit i cili thyen heshtjen dhe i ekspozon shokët e klasës tek miqtë e tjerë të cilët i ka takuar përmes rrjeteve sociale, ndërsa ngjarja tjetër sjell tregimet e katër grave dhe barrën e të qenit vajzë në familjet pa djem – përplot me ankth, paragjykime dhe kurajë!

Programi ynë i i prodhimit DokuLab sjell filmbërës aspirues në një ambient të këndshëm për të fituar bazën e kuptimeve konceptuale dhe kritike të filmit duke mësuar aspektet teorike dhe praktike të film-bërjes nga profesionistët e fushës së filmit Blerta Zeqiri, Andrijana Stojković, dhe Samir Karahoda.

Në po këtë natë do të shfaqen edhe filmat që janë prodhuar përmes programeve të ngjashme edukuese nga organizatat në partneritet Free Zone nga Beogradi dhe Pravo Ljudski nga Sarajeva.

Dita tjetër është rezervuar për filmbërësit aspirues të cilët morën pjesë në kampin një vjetor të filmit. Dy nga studentët tanë të cilët vitin e kaluar ishin pjesë e edicionit të programit trajnues Future is Here, po rikthehen këtë vit me dy filma të shkëlqyer. Njëri, që shpalos kujtimet e një ditari të luftës ndërsa tjetri shqyrton integritetin shoqëror në teksteve të këngëve. Ky program kompleks ishte iniciuar vitin e kaluar nga dy regjisorët e njohur Blerta Zeqiri dhe Karen Winther.

Ndërkaq, shtatë filma në total nga Film and Factual Media do të prezantohen të mërkurën, me datën 7 Gusht prej orës 20.00 tek kinematë pranë lumit. Hijeshia e mbrëmjes do të pasurohet nga shfaqja e parë e filmave bashkëpunues nga Regional Creative Documentary Film Lab Active – i cili u konceptua si një program edukimi jo-formal dhe mblodhi bashkë filmbërësit dhe të rinj kreativë të interesuar në filmat dokumentarë.

Programi u ofroi filmbërësve të rinj të Ballkanit resurse teknike, kreative, aftësi strategjike si dhe mundësi rrjetëzimi, të nevojshme për t’i hyrë profesionalisht rrugëtimit kinematografik. Ndërkaq një program i gjerë dy javor u organizua në Shkup dhe Ulqin, i koordinuar nga Pravo Ljudski nga Sarajeva si dhe nga DokuFest.

“Asnjëherë nuk kemi dyshuar në potencialin e rinisë sonë.” u shpreh kreu i DokuLab, Eroll Bilibani, i cili është i angazhuar për ta zgjeruar këtë program edukimi si dhe programin e kinemasë udhëtuese. “ E vërteta është se, jemi jashtëzakonisht krenarë nga arritjet e këtyre talentëve të rinj të cilat ndodhën në mes të dy edicioneve të festivalit dhe ne mezi presim ta festojmë së bashku këtë sukses me partnerët dhe audiencën tonë të veçantë.”

Legowelt x Privacy | DokuNights

Ikona e muzikës house Legowelt do të performojë për herë të parë në DokuNights, përcjellur nga producenti i pakompromis i Berlinit, Privacy, me datën 9 Gusht.

Danny Wolfers i njohur si LEGOWELT është vërtet i veçantë. Producent dhe performues i cili arrin t’i mbulojë skenat e ndryshme me një lehtësi dhe një stil përherë unik me një botë përtej asaj që shohim në trendet e zakonshme.

Krijimet e tij muzikore kapin botë të ndryshme – disa të vërteta, disa imagjinare- dhe e gjitha kjo ndodh përmes një mënyre tejet unike dhe joshëse që arrin t’i mbajë dëgjuesit të magjepsur. Që nga dalja e tij e parë në fillim të viteve nëntëdhjetë, ai u bë figurë kyqe në skenën e Bregut Perëndimor të Holandës si dhe familjes Bunker, i frymëzuar nga pionerët e Detroitit dhe Çikagos si dhe filmave fiktiv-shkencor dhe sot njihet për dimensionet e technos moderne të shtrira në ritet e tij.

Për më tepër, nuk kalon asnjë vit në të cilin Danny Wolfers nuk publikon një album. I njohur me emrin Legowelt, ai shquhet për stilin e tij unik i cili nxirret nga përkushtimi i tij i palëkundur ndaj harduerit, qoftë i vjetër apo krejtësisht i prishur. Përmbledhtas, ky njeri është artist, forca muzikore e të cilit nuk mund të ndalet.

PRIVACY sipas emrit, privat nga natyra: artisti në fjalë nuk ka nevojë të shpërfaqë asgjë për vetën e tij më shumë se muzika e tij meqë ajo mjafton të na mbajë mendjen e zënë e këmbët në tokë. Është muzikë elektro por me nuanca të lehta dalluese se si valët na bëjnë të kërcejmë, mënyra se si tingujt metalikë na godasin shqisat dhe thellësia e sintetizimit të saj në psikën tonë.

Përherë i pakompromis dhe autentik, muzika e Privacy zbulon përherë e më shumë sa herë që e dëgjojmë. Funksionon edhe në pistën e vallëzimit e në të ka detaje saqë ndëgjimi vëmendshëm na e shpërblen vëmendjen. E njëjta ndodh edhe në kabinën e DJ ku sete eklektike kthejnë e përsillin muzikën me qëllim dhe kuptim. Mund të mos dimë shumë për Privacy, ama, e dimë sigurt që ai kurrë nuk dështon së zbavituri turmën në mënyra të buta, të ndryshme dhe nganjëherë mashtruese. Dhe në fakt, çfarë tjetër ka rëndësi?

LABORATORI I ANTROPOLOGJISË VIZUALE: Kufijtë: kujtimet, praktikat dhe idealet

Në partneritet me Departamentin e Universitetit të Shqipërisë, jemi të lumtur që këtë vit mbajmë sërish një punëtori nga Laboratori i Antropologjisë Vizuale në DokuFest.

Kufijtë: kujtimet, praktikat, idealet

Për një kohë të gjatë, antropologët janë marrë me çështjet e kufijve duke dashur mbase t’i tejkalojnë ato. Në terma të gjerë, kufijtë qoftë si territore fizike apo mentale, reprezentojnë dinamikat e ndarjes, dallimeve, ndalimit, takimeve dhe shkëmbimeve. Brezat kufitarë u ofrojnë hulumtuesve një shembull të qartë të një zone me status specifik social, ekonomik, ligjor dhe politik duke përfshirë thelbin e asaj se çfarë kufijtë janë si produkte historike të marrëdhënieve të pushtetshme të shteteve moderne.

Kufijtë e ndërtuar nga shtetet moderne kanë formësuar dukshëm jetët e njerëzve. Në vend të urave, bota bashkëkohore po ngre gardhe, mure rrethuese dhe kufij. Për më tepër, ne jemi dëshmitarë se si parimi i sigurisë po shkatërron një sërë të formave të lirisë nëpërmjet kufizimeve të të drejtave të qytetarëve dhe zbatimit të kontrolleve kufitare për “të huajt”. Një kulturë e frikës dhe pasigurisë së përgjithësuar është vulosur në shoqëritë e sotme prej paradigmës së post-të vërtetës e cila po fiton terren në diskurset globale bashkëkohore dhe nacionale politike. Ajo që dikur ishte idealja e një bote pa kufij e që formësoi shpresat e të shumtëve pas rënies së komunizmit, sot i ngjan një vizioni utopik.

Edicioni i katërt i Laboratorit të Antropologjisë Vizuale hulumton mënyrën se si kufijtë ndikojnë jetët e njerëzve. Katër ekipe të studentëve kanë dokumentuar vizualisht një numër tregimesh mbi atë se si komunitet kufitare e përjetojnë kufirin politik midis Shqipërisë dhe Kosovës. Këto takime vizuale do të jenë bazë për diskutimet mbi kujtesën, perceptimet, praktikat dhe idealet e njerëzve drejt kufijve mbi liritë që janë ngritur historikisht dhe vazhdojnë të mbështeten edhe sot nga shtetet moderne.

Koha: 09:30 – 13:00

Datat: 08/09/10 Gusht

Lokacioni: Kino Klub

Gjuhët: English/Shqip

Rrëfimet zhbiruese të së vërtetës: Larisa, Handsworth, Orestes.

I kuruar nga Sezgin Boynik, Tevfik Rada dhe Nagehan Uskan, programi Rrëfimet zhbiruese të së vërtetës: Larisa, Handsworth, Orestes pjesë e DokuFest2019, prezanton tre filma që testojnë kufijtë e përfaqësimit dhe, propozojnë një gjuhë filmike që vete përtej kufizimeve mbi atë se si rrëfimet e përpjekjeve klasore duhet të tregohen.

Rrëfimet zhbiruese të së vërtetës: Larisa, Handsworth, Orestes

Në filmin Handsworth Songs, pjesë e repertuarit të kolektivit Black Audio Film Collective (BAFC), mes makinave të djegura dhe sirenave të policisë, dëgjojmë zërin e një gruaja tek thotë “nuk ka tregime në trazira, ka vetëm fantazma të tregimeve të tjera”.

Kjo deklaratë është dëshmi e së vërtetës, që vetë-deklarohet vetëm në momente shpërthimesh.

Me një seri prej tre filmash, programi synon të shfaqë dhe diskutojë tri rrëfime të njerëzve të ndryshëm, situatave dhe lëvizjeve të formësuara në thyerje. Ajo që i shkrinë në një tregimin e Larisa Reissner me trazirat e proletariatit të zi urban në periferinë e Birminghamit dhe tregimin e Orestias që zhvillohet në Afrikë, nuk qëndron vetëm tek historia e luftës dinjitoze të këtyre njerëzve për emancipim dhe liri. Ajo është poashtu e ndërlidhur me artin e rrëfimit të këtyre ngjarjeve si një ide poezie, si një regjim i së vërtetës.

Filmi About Narration nga viti 1975 nga Harun Farocki dhe Ingemo Engström është një film mbi jetën e Larisa Reissner, poete dhe revolucionare e cila e tradhëtoi klasën e saj dhe përdori aftësitë e saj për të treguar historitë e njerëzve të varfër nga Hamburgu në Afganistan.

Filmi i parë Handsworth Songs i Black Audio Film Collective (BAFC) i vitit 1987, është film i rrëfimeve të pamundura të përpjekjeve të diasporës. Ndryshe nga rrëfimet e tjera të ngashërimit dhe melankolisë, Handsworth Songs është rrëfim i imigracionit, i rrëfyer përmes altoparlantësh të muzikës dub underground, periferive të trazuara dhe rrëfim i një zgjimi historik.

Ndërkaq, Notes Towards an African Orestes është njëri ndër filmat më eksperimentalë dhe eseistë të Pier Paolo Pasolinit, i bërë në vitin 1970. Filmi prezanton ngjarjen e Orestias në Afrikën bashkëkohore dhe është i nyjëzuar me tinguj të lirë të jazz-it, rrethana neo-koloniale, përcjellë nga komentime të studentëve Afrikanë në Romë.

FACT OR FAKE: Truth on Film

Fact or Fake: Truth On Film është një program i veçantë i kuruar rreth nocionit të së vërtetës, temës kryesore të edicionit të sivjetmë të festivalit e që sjell 11 filma të cilët përmes kinemasë eksplorojnë të vërtetën në kuptimin e plotë të fjalës.

Në këtë program do të gjeni filma që hedhin dritë mbi të vërtetat (nganjëherë edhe mbi gënjeshtrat), siç është rritja e popullizmit të krahut të djahtë në Hungari, lufta kundër drogës në Filipine, misteret që përndoqën vdekjen e sekretarit të përgjithshëm të OKB-së, gjykimin e trilluar në periudhën e Stalinit dhe BRSS-së apo vrasjen masive të çifutëve në Odessa në vitin 1941 nga forcat Rumune. Do të mund të shihni edhe rrugëtimin e vështirë të tranzicionit të Myanmarit drejt demokracisë ose kërkimin botëror të asaj se çfarë demokracia nënkupton në të vërtetë! Rrëfime të një spiuni i cili lufton sistemin ose të një kolektivi të vogël gazetarësh të cilët zbuluan fatkeqësinë e MH17 dhe atë të helmimit të një spiuni Rus në Mbretërinë e Bashkuar. Do të gjeni edhe atë ngjarjen e famshme për falsifikimin e veprave të artit, të rrëfyer nga një prej mjeshtrave më të mëdhenj të kinemasë.

 

DokuKids 2019

Edhe për këtë vit, kemi kuruar një program special për më të veçantit tanë të DokuKids, me plot filma, punëtori të animacionit, vallëzime, lojëra e dëfrim!

DOKUKIDS FILM PROGRAM
Data: 3- 9 Gusht, 10-11:30 am
Lokacioni: Kino Lumbardhi
Mosha: 6-15

Programi i filmave DokuKids do të shfaqë 50 filma të animuar për shtatë ditë rradhazi, duke filluar nga data 03 deri më 09 Gusht. Kemi kuruar një program unik të filmave për më të vegjlit tanë, përplot me karaktere të gëzuara dhe me momente jashtëzakonisht të hareshme. Programi ofrohet falas për të gjithë fëmijët e moshës 6- 15 vjeç dhe fillon nga ora 10:30 – 11:00 në Kino Lumbardhi.

TOGETHER WE DANCE
Data: 3- 09 Gusht, 12-14 pm
Lokacioni: Gjimnazi Loyola
Mosha: 7-15

Një hyrje në botën e vallëzimit, që përfshin imagjinatën me kënaqësinë me teknikat bazë të vallëzimit. Pjesëmarrësit gjithashtu do të përfitojnë nga programi vlerësim muzikor, përmes një game të gjerë të këngëve dhe lojëra fjalësh. Për më tepër, fëmijët pjesëmarrës do të arrijnë të kuptojnë ritmin, kualitetin e lëvizjes, hapësirës, do të bëhen më të vetëdijshëm për lëvizjet si dhe formën trupore. Performanca e vallëzimit të fundit do të mbahet në Shadërvan, me datën 11 Gusht duke filluar nga ora 18:00.

ANIMATION WORKSHOP
Data: 5- 7 Gusht
Lokacioni: Gjimnazi Loyola
Mosha: 9-14

Kursi i animuar shumë-ditor i filmit u mundëson fëmijëve dhe të rinjve ndjenjën e parë për mediumin kornizë pas kornize. Nëpërmjet ushtrimeve të vogla praktike dhe duke luajtuar (si dhe karaktereve të animuar dhe prerjeve) ata do të mësojnë ritmin dhe lëvizjen. Për fillim, fëmijëve do t’u prezantohen disa filma, kështu që ata të mund të frymëzohen nga metoda të ndryshme për të treguar një ngjarje. Së bashku do të analizojmë teknika të ndryshme dhe të punojmë me to. Pra do të përdorim karakteret klasike si dhe prerje të ndryshme si dhe materiale haptike si objektet e kështu me radhë. Qëllimi do të jetë krijimi i një filmi të vogël prej 1 deri në 3 minuta me zë.

ACRO DANCE
Data: 5-8 Gusht, 12:14 pm
Lokacioni: Loyola
Mosha: 7- 15

Përfshirja e elementeve të gjimnastikës në dysheme me valle. Një zhanër i fuqishëm që zhvillon fleksibilitetin, forcën dhe kontrollin e kombinuar me muzikalitetin. Përmirëson vetë-besimin, fleksibilitetin dhe aftësinë në klasë duke shkrirë vallen dhe lëvizjet e gjimnastikës, të cilat do t’u mësohen fëmijëve nga një balerin profesionist. Ejani dhe mësoni disa nga truqet dhe lëvizjet akrobatike dhe për të qenë pjesë e një performance grupore në fund të këtij sesioni.

ANIMATION WORKSHOP: Truth vs. Lie
Data: 8 – 9 Gusht
Lokacioni: Gjimnazi Loyola
Mosha: 09-14

Është shumë e rëndësishme të dihet dallimi mes të vërtetës dhe gënjeshtrës. Por, nganjëherë nuk është edhe aq e lehtë… Paramendojeni sikur E vërteta dhe Gënjeshtra të jenë karaktere të animuara. Si duken ato? A kanë forma njerëzore, a janë krijesa të çuditshme, forma apo shkronja? Si lëvizin dhe si flasin ato me njëra tjetrën?

Të krijojmë një film të shkurtë të animuar për të vërtetën dhe gënjeshtrën (ndihmojeni të vërtetën që të fitojë). Në punëtori do të mësojmë bazat e teknikave të animacioniut, do të vizatojmë dhe diskutojmë. Animacioni është qejf, por edhe shumë i dobishëm për të na ndihmuar të tregojmë disa rrëfime tejet interesante!

Regjistrimi për të gjitha punëtoritë bëhet tek DokuShop, fuke filluar nga 1 Gushti.

 

Shfaqje speciale: Forgiving the Blood

Dokumentari i BBC-së ‘Forgiving the Blood’ do të ketë shfaqjen e tij speciale për edicionin e tetëmbëdhjetë të DokuFest. Me regji të Melissa Llewelyn Davis dhe me Lala Meredith-Vulën si hulumtuese kryesore, filmi ndjek lëvizjen masive për faljen e gjakmarrjes që zuri fill në mesin e popullatës shqiptare në vitet e 90a.

Lëvizja nisi me një grup studentësh radikalë të cilët kishin rekrutuar Profesorin e Folklorit në Universitetin e Prishtinës, Anton Çeta, për t’i udhëhequr ata përgjatë vështirësive dhe konflikteve të klaneve. Filmi prezanton si rast studimi njërën nga familjet e fundit, në vitin 1991, e cila refuzonte t’ia falte gjakun e djalit të tyre të vrarë familjes së vrasësit të tij. ‘Forgiving the Blood’ është një shembull i mirë i përdorimit vizual etnografik të një rasti të vetëm për të zbuluar një histori shumë më të gjerë dhe më të thellë politike. Ndër të tjera, filmi shqyrton mënyrat se si një familje bujqësore margjinale arrin t’i rezistojë presionit të madh për të folur dhe për të vepruar si anëtare e një qytetarie kombëtare.

Ne jemi jashtëzakonisht krenarë të mirëpresim shfaqjen e parë publike të këtij filmi në Kosovë, me datën 7 Gusht, tek Kino Lumbardhi duke filluar prej orës 20.00. Melissa Llewelyn Davis, Lala Meredith Vula dhe Neriman Kamberi do të jenë prezentë dhe do të marrin pjesë në një diskutim pas shfaqjes së filmit.

View from the World

Përzgjedhja e sivjetme e View from the World shpalos 15 filma të cilët u bëjnë jehonë rrëfimeve nga mbarë bota, eksplorojnë karaktere të përziera si dhe kapin realitetet e tyre të ndërthurura në botët intime.

I filmuar për më tepër se 3 vjet, ANGELS ARE MADE OF LIGHT gjurmon jetët e nxënësve të rinj dhe mësuesve të tyre në një shkollë në qytetin e vjetër të Kabulit. Regjisori James Longley ndërthur historinë moderne të Afganistanit me portretin  e ditëve të sotme të një lagjeje të klasës punëtore duke ofruar një ekzaminim intim dhe vizion të nuancuar duke vënë në pah pikëpamjet e karaktereve të shumëfishta.

Në filmin MIDNIGHT FAMILY, regjisori Luke Lorentzen endet nëpër lagjet më të pasura të Meksiko Sitti, ku familja Ochoa udhëheq një ambulancë private, duke garuar me shërbimet urgjente shëndetësore të tjera fitimprurëse për pacientët që kanë nevojë për ndihmë urgjente. Teksa familja Ochoas përpiqen të fitojnë jetesën në këtë industri të tensionuar, ata luftojnë të mbajnë financat e tyre të llahtarshme larg komprometimit të personave që janë nën kujdesin e tyre.

Filmi i Beniamino Barrese, THE DISAPPEARANCE OF MY MOTHER përcjellë jetën e Benedettës, e njohur modele ikonë e të 60ve, si feministe radikale si dhe muzë e Warhol, Dali, Penn dhe Avedon. Por në moshën 75 vjeçare, asaj i vije në majë të hundës me të gjitha rolet që ia ka imponuar jeta dhe vendos të lërë gjithçka dhe gjithkënd. Djali i saj e përcjellë me kamerë gjithë këtë proces duke dashur të bëjë një film për të e që bëhet shkak zënkeje mes të dyve.

Regjisori Thomas Heise përzgjedh pjesë biografike të një familjeje të copëtuar gjatë fundit të shekullit XIX dhe në shekullin XX. HEIMAT IS A SPACE IN TIME ka të bëjë me njerëzit të cilët e kanë gjetur njëri tjetrin rastësisht, vetëm për ta humbur atëherë njëri tjetrin. Tani janë pasardhësit e tyre, fëmijët dhe nipërit e tyre të cilët po fillojnë të zhduken.

Filmi i Iván Osnovikoff dhe Bettina Perut zhvillohet në Los Reyes, skateparkun më të vjetër në Santiago dhe tubon adoleshentët nga shtresa të ndryshme shoqërore dhe kulturore. Bota njerëzore shfaqet në tregime të adoleshentëve transit për në pjekuri. Në LOS REYES, ne arrijmë të dëgjojmë zëra dhe shohim fragmente të trupave të tyre si pjesë e një mjedisi që rrethon botën e qenve.

Me regji të  Vitaly Mansky, PUTIN’S WITNESSES bazohet në dëshmitë unike dhe të sakta dokumentare të rasteve të vërteta dhe pasojave të operacionit “Pasuesi”, si rezultat i të cilit Rusia përfundoi me Presidentin i cili akoma e udhëheq vendin. Personazhet e filmit janë Mikhail Gorbachev, Boris Yeltsin, Vladimir Putin, dhe kombi rus, si gjithmonë duke qenë i dëshmitar i heshtur i fatit të vet.

Nga regjisori fitues i çmimit E. Chai Vasarhelyi dhe fotografi dhe montazheri me famë botërore Jimmy Chin,  vjen FREE SOLO, një portret magjepsës, intim, i pa zmbrapsur i alpinistit të lirë Alex Honnold, teksa përgatitet të përmbush ëndrrën e tij jetësore: të ngjitet në faqen e shkëmbit më të famshëm në botë… në El Capitanin 1000 metra të lartë në Parkun Kombëtar Yosemite… pa litar.

Duke eksploruar shoqërinë e gjatë 45 vjeçare, filmi i Suhaib Gasmelbari Suhaib TALKING ABOUT TREES, prezanton historinë e  Ibrahimit, Sulejmanit, Manarit dhe Altayebi.  Ata u larguan nga mëmëdheu i tyre në vitet 1960 dhe 1970 për të studiuar filmin jashtë vendit dhe themeluan Grupin e Filmit Sudanez më 1989. Vite pas ekzilit dhe largësisë, ata u bashkuan, duke shpresuar që më në fund të bëjnë ëndrrën e tyre të vjetër realitet; të sjellin kinemanë në Sudan.

Si i thyen shekujt e tërë të traditës brenda për brenda një feje? Kjo është pyetja që shoqëron filmin e Marie Skovgaard THE REFORMIST – A FEMALE IMAM teksa ajo përcjell Sherin, e cila po hap njërën prej xhamive të para në Evropë të udhëhequr nga gratë imame. Anëtarët e xhamisë synojnë të përballen dhe të sfidojnë frikën që e rrethon islamin dhe të bëjnë thirrje për një lloj tjetër të tij duke përfshirë një agjendë feministe.

WHAT YOU GONNA DO WHEN THE WORLD’S ON FIRE nga Roberto Minervini ndodh në verën e vitit 2018 ku një varg vrasjes brutale policore të djemve të rinj afro-amerikanë ka shpërndarë valë tronditjeje nëpër vend. Një komunitet zezakësh në jugun amerikan përpiqet të përballojë efektet e vazhdueshme të së shkuarës dhe të çojë vendin e tyre në një shtet që nuk është në anën e tyre. Ndërkohë, Panterat e Zinj përgatisin një protestë me përmasa të mëdha kundër brutalitetit policor.

Regjisorja Akbari prezanton një propozim shkrirje të gjuhës, ku një takim i kinemasë dhe skulpturës heton procese të shkatërrimit dhe ripërtëritjes fizike dhe psikologjike. A MOON FOR MY FATHER shikon lidhjen në mes të trupit të saj dhe historisë politike të Iranit, duke hetuar marrëdhënien në mes të traumave të saj fizike dhe kujtesës kolektive politike të vendlindjes së saj.

Dokumentari MEETING GORBACHEV i Werner Herzog dhe Andre Singer, i mbushur me materiale arkivore të paharrueshme dhe bazuar në tri intervista të gjata, ofron qasje të paparë në botën e politikanit më të madh të gjallë. Herzog, si intervistues në ekran, nuk e maskon dashurinë e tij, duke lartësuar tri arritjet e shquara të Gorbachevit: negociatat me SHBA për reduktimin e armëve bërthamore; ndërprerjen e kontrollit sovjetik ndaj Evropës Lindore dhe ribashkimin e Gjermanisë; dhe shpërbërjen e Bashkimit Sovjetik dhe Bllokut Lindor. Të gjitha këto në vetëm gjashtë vjet!

Eva – 25 vjeçare, endacake, nga Berlini, poete, pronare kafshësh shtëpiake, punëtore seksi, virgjëreshë, e varur në proces shërimi, shtëpiake, feministe, modele – shpalli privatësinë një koncept i dalë mode në moshën 14 vjeçare. Ky është rrëfimi i një vajze të re e rritur në moshën e internetit, që kthen kërkimin për veten në një spektakël publik, duke ju sfiduar në atë se çfarë “duhet të jetë” një grua. Në filmin SEARCHING EVA të regjisores Pia Helenthal do të mund të shihni shfaqjen e një gjenerate, në të cilën koncepti i një identiteti të caktuar është vjetruar. Një portret i ekzistencës moderne.

DIEGO MARADONA është historia e egër dhe e paharruar e talentit të dhënë nga Zoti, lavdisë, dëshpërimit dhe tradhtisë është filmi i tretë nga Asif Kapadia, regjisori fitues i Oscarit me Amy dhe Senna, dhe është ndërtuar nga më se 500 orë incizimesh të paparë nga arkivi personal i Maradonës, i përdorur me përkrahjen e plotë të legjendës.

Teksa çmimet e banimit po ngrihen në mënyrë rapide në qytetet përreth botës, filmi i Fredrik Gertten, PUSH, hedh dritë në një tjetër lloj pronari të pafytyrë, qytetet tona të pajetueshme dhe një krizë në rritje që ndikon në të gjithë ne. Ky nuk është renovim, është lloj tjetër përbindëshi. Filmi ndjek Leilani Farha, raportuesen e posaçme të Kombeve të Bashkuara për Banimin Adekuat, teksa udhëton nëpër botë, duke u përpjekur të kuptojë se kush po largohet nga qyteti dhe pse. Ari nuk është e drejtë njerëzore, banimi është,” shprehet Leilani.