09/08/2024
Si sponsor krenar i DokuFest-it, IPKO synon të jetë një forcë pozitive në jetën e çdo anëtari të komunitetit duke mbështetur aktivitetet kulturore dhe edukative, thotë Afrika Zyferi, Udhëheqëse e Njësisë së Komunikimit. Në një intervistë për DokuStories, Zyferi tregon më shumë për bashkëpunimin me DokuFestin dhe se si IPKO është e përkushtuar të qëndrojë pranë komunitetit dhe të mbështesë rritjen dhe zhvillimin e rinisë dhe kulturës në Kosovë.
DS: Si ju frymëzon DokuFesti që të përkrahni aktivitetet në skenën e pavarur kulturore të Kosovës?
Zyferi: DokuFest na frymëzon të investojmë në pasurinë kulturore të komunitetit tonë duke sjellë filma dhe vizitorë nga mbarë bota në Prizren. Ky festival ndërkombëtar i filmit të shkurtër jo vetëm që promovon artin dhe kulturën, por gjithashtu inkurajon debatin mbi temat aktuale. Si sponsor krenar i DokuFest, IPKO ka angazhimin për të qëndruar pranë komunitetit dhe për të mbështetur rritjen dhe zhvillimin e rinisë dhe kulturës sonë. Ne besojmë se përmes këtij festivali, kontribuojmë në promovimin e një mjedisi artistik të pasur dhe të qasshëm për të gjithë.
DS: Çfarë synon IPKO me mbështetjen e aktiviteteve të tilla kulturore, që bashkojnë artistët vendorë e ndërkombëtarë me audiencën e gjerë?
Zyferi: IPKO synon të jetë një forcë pozitive në jetën e çdo anëtari të komunitetit tonë duke mbështetur aktivitete kulturore dhe edukative. Sponsorizimi i DokuFest ndihmon në promovimin e artit dhe kulturës, dhe inkurajon debatin mbi temat aktuale. Ky festival sjell së bashku artistë vendorë dhe ndërkombëtarë me një audiencë të gjerë, duke krijuar një platformë të pasur për shkëmbimin e ideve dhe përvojave. Me këtë mbështetje, IPKO synon të forcojë lidhjet kulturore dhe të nxisë një mjedis të hapur dhe të pasur për krijimtari, duke kontribuar në zhvillimin e një komuniteti më të lidhur dhe të frymëzuar.
DS: Si përputhet e tërë kjo me angazhimet e juaja për të forcuar lidhjet me komunitetin përmes teknologjisë dhe angazhimit kulturor?
Zyferi: Angazhimi ynë për të forcuar lidhjet me komunitetin përmes teknologjisë dhe angazhimit kulturor reflektohet në një sërë iniciativash. Si pjesë e DokuFest, IPKO ka organizuar dhe mbështetur punëtorinë DokuKids për fëmijët e moshës 12-15 vjeç, duke u ofruar mundësinë të zhvillojnë aftësitë në krijimin e videove përmes telefonave mobil. Kjo nismë edukative ndihmon në zhvillimin e aftësive teknologjike të rinisë. Për më tepër, ne kemi shpërblyer disa klientë fatlum me bileta falas për festivalin, duke i inkurajuar të marrin pjesë në këtë ngjarje kulturore. Në tendën tonë gjatë festivalit, ne po prezantojmë produktet dhe shërbimet më të fundit, duke përfshirë oferta speciale për telefoninë mobile, televizionin digjital dhe internetin, si dhe pako për Diasporën. Këto veprime përputhen me përkushtimin tonë për të ofruar zgjidhje inovative dhe për të mbështetur zhvillimin kulturor dhe edukativ të komunitetit.
