I themeluar në vitin 2003, me qëllim të revitalizimit të kulturës së kinemasë në Prizren, DokuFest u rrit dhe u zgjerua në njërën ndër ngjarjet më të rëndësishme të filmit dhe muzikës në Europën Juglindore dhe prej vitit 2020 edhe festival kualifikues në BAFTA.

Çdo verë, DokuFest mbush kinematë si dhe hapësirat e tjera të improvizuara ku shfaqen filmat nëpër qendrën historike të qytetit të Prizrenit, me një përzgjedhje të kujdesshme të më shumë se 200 filmave nga e mbarë bota si dhe duke sjellur performanca muzikore lokale dhe ndërkombëtare në DokuNights.

Një pjesë speciale e festivalit janë edhe vullnetarët tanë, të cilët gjatë festivalit mbushin cepet e qytetit të Prizrenit duke mirëpritur mysafirët, duke punuar në DokuShop si dhe nëpër kinema. Dedikimi dhe dashuria e tyre e ka bërë festivalin të jetë ky që është sot!

Çdo vit, festivali zgjedh një temë të veçantë e cila theksohet në debate, masterklasa, diskutime, panele dhe punëtori bashkëpunuese.

E gjithë atmosfera e gjallë në qytet ja shton hijeshinë festivalit duke e bërë kështu njërën ndër ngjarjet që nuk duhet humbur në këtë pjesë të botës.