Rexhep - What Killed the Architect

Përshkrimi

“REXHEP – Çka e vrau arkitektin” është dokumentar për jetën dhe punën e arkitektit e urbanistit Rexhep Luci dhe për Prishtinën, qytetin që e deshi dhe qytetin ku u vra në shtator të vitit 2000. Dokumentari flet për marrëdhënien e tij personale dhe profesionale me qytetin, nga përkushtimi i tij për rritje urbane gjatë kohës së Jugosllavisë deri tek vendosmëria e tij për t’i parandaluar ndërtimet pa leje në periudhën e pasluftës. Mbesa e tij, Besa, përmes bisedave intime me familjarët dhe kolegët e Rexhepit, si dhe duke e përcjellë një ndërhyrje arkitekturore në rrugën që mban emrin e tij, na dërgon në një rrugëtim nëpër jetën e tij dhe zhvillimin urban të Prishtinës. Dokumentari shtjellon se çka e ndalë një arkitekt.

Biografia e Regjisorëve

Mathieu Jouffre është filmbërës nga Lioni i Francës, ku edhe ka diplomuar në shkollën e arteve pamore. Ai ka bërë dhe bashkëpunuar në filma të shkurtër dhe dokumentarë për kinema dhe televizion, ndërmjet Francës dhe Ballkanit. Jouffre ka udhëtuar në rajon për më shumë se një dekadë dhe tani jeton dhe punon në Kosovë.